ALǴÍSNAMA

Biz, jası úlkenlerdiń, jıllar dawamında miynet etip endi ǵarrılıq gáshtin súreyin degende bir qatar kesellikler de bizlerge joldas bola qalatuǵını da haqıyqat. Mine usındayda tez-tezden aymaǵımızdaǵı aq xalat iyelerinen járdem sorap emlenemiz. Densawlıq saqshıları dep te biykarǵa aytılmasa kerek. Óytkeni, kópshiligimizde sozılmalı keselliklerimiz bar, qantlı diabet, júrek-qan tamır kesellikleri de mudamı shıpaker qadaǵalawın talap etip turadı. Sonlıqtan, medicina xızmetkerleriniń salamatlıǵımızdı qorǵawdaǵı xızmeti úlken. Biziń elimizde bolsa pidayı shıpakerler biz kekselerdi mudamı húrmet hám itibarında saqlap keledi, keselliklerimizdi emlep baradı. Solarǵa óz pátiyamızdı hám alǵısımızdı berip barıw biz jası úlkenler ushın hám qarız, hám parız sanalsa kerek. Bir jaǵınan bul adamgershiliktiń, shúkirshiliktiń hám medicinamızǵa degen raxmetimiz de.

Sozılmalı keselligimiz bolǵan 2-tip qantlı diabet (diabetlik polinefropatiya) sebepli elimizdiń belgili emlew orınlarınan biri bolǵan Akademik Turaqulov atındaǵı Respublikalıq qánigelestirilgen endokrinologiya ilimiy-ámeliy medicina orayınıń Qaraqalpaqstan Respublikası filialına Moynaq rayonınan kelip emlendik. Álbette, hárqanday nawqas kisi eń dáslep ózine degen itibardi kútedi. Bizler usı emlew ornınıń 1-terapiya Diabetlik nefropatiya bólimine barǵan waqtımızda-aq, bólim meńgeriwshisi Bekpolat Pirniyazovtan usı nárseni taptıq. Ol kisi biz kekseler menen joqarı shıpakerlik mádeniyat penen sóylesti hám óz bólimine jaylastırdı. Keyin ala bólimde maman shıpaker sıpatında tanılǵan Lola Romanova bizlerge emlewshi shıpaker sıpatında bekitildi. Bólim meńgeriwshisi B.Pirniyazov hám shıpaker L.Romanovalar bizlerdi dáslep tereń kórikten ótkerdi hám tiyisli emlew usılların belgilep berdi. Keselligimiz tuwralı hám onı qalay jeńip ótiwimiz boyınsha túsinikler berdi. Eń baslısı, ómirge degen qushtarlıq hám pozitiv kózqaras ekenligin uqtırdı. Haqıyqatında da, biz kekse jastaǵı kisiler ushın bul jas qánigelerdiń bergen táselleleri sawalıwımızǵa degen dáslepki unamlı tásirin tiygizdi.

Házir, Qudayǵa shúkir, densawlıǵımız ádewir jaqsı. Bólimde tamırǵa tez hám anıq túsetuǵın sheber miyirbiykeler Liza Berdibaeva, Esbergenova Sapargúl, Qurbaniyazova Indiralar bas miyirbiyke Aysulıw Aytuwǵanova basshılıǵında shıpakerlerdiń buyırǵan dárilerin óz waqtında saldı. Hár procedura waqtında ózleriniń hár túrli házil-dálkekleri, qızıqlı sáwbetleri menen qabarǵan kewlimizdi kóklerge kóterdi. Bul, álbette, joqarı medicinalıq bilim menen qatar nawqaslar menen múnásibet ornatıwdıń basqalar úlgi alarlıq tárepi edi.

Al, xojalıq miyirbiykesi Injigúl Ábdijamilova bolsa taza matras hám prostınyalar menen támiyinlep, tap óz úyimizde jatqandaǵıday atmosferanı támiyinlep berdi. Sanitarka Baxıtgúl Dosnazarova bolsa emleniw waqtımızda jatqan palatamızdı óz waqtında tazalıǵın támiyinlep berdi. Kerek bolsa, shay-awqat ishken ıdıslarımızdı da pidayılıq penen juwıp, tap-tuynaqtay etip qoydı.

Bizler emleniw barısında bir nársege isenim kámil ettik, bul bólimde, ulıwma alǵanda usı Akademik Turaqulov atındaǵı Respublikalıq qánigelestirilgen endokrinologiya ilimiy-ámeliy medicina orayınıń Qaraqalpaqstan Respublikası filialında hár bir medicina xızmetkeri (meyli shıpaker, meyli miyirbiyke, meyli sanitarka h.t.b.)niń sistemalı hám tártip penen háreket etiwi, bizińshe, bul orınǵa shıpa izlep kelgen hárqanday nawqastıń tezirek sawalıwına sebepshi bolıwı sózsiz.

Sózimizdiń juwmaǵında, joqarıda atı atalǵan medicina xızmetkerleriniń jumıslarında bárqulla tabıslar bolsın, densawlıqları mıqlı bolıp, xalıq xızmetinde sharshamaǵay. Mámleketimizdiń joqarı ataq hám sıylıqlarına erisiwine tileklespiz.

Maqset JAQSÍMURATOV, Raya ALIMBETOVA, Moynaqlı pensionerler.

“SHIPAKER” gazetasidan